Gazetari Vehbi Kajtazi, duke i elaboruar arsyet e kërkimit të rinumërimit në Prishtinë dhe Prizren, ka theksuar se rinumërimi i konvenon më së shumti Partisë Demokratike të Kosovës (PDK).

Kajtazi në emisionin “Debat D Plus”, të RTV Dukagjini, ka thënë se Lidhja Demokratike e Kosovës (LDK), ka ofruar argumentet e saja se pse duhet të bëhen rinumërimi i votave dhe nuk ka përdorur diskurs agresiv.

“LDK-ja ka dhënë argumentet e veta, duke i përmendur disa qendra të votimit, ku janë gjetur qindra fletëvotime të zbrazta”, ka shtuar Kajtazi.

Sipas tij, nuk është e rastësishme që PDK-ja të shtyjë më së shumti përpara rinumërimin e votave në Prishtinë, duke shtuar se përmes kësaj partia e Veselit do ta arsyetonte rinumërimin në Prizren.

Ai mendon se përmes rinumërimit të votave, tentohet të ngjallet reagimi i VV-së, dhe mospranimi i rezultateve nga ana e kësaj partie, e që sipas tij, do të krijonte një krizë në vend.

“E, siç e dimë, krizat më së tepërmi i konvenojnë Presidentit të Kosovës, Hashim Thaçi, e veçanërisht krizat i konvenojnë atij kur e kemi afër ngritjen e aktakuzave të para të Gjykatës Speciale”.